စစ်အာဏာသိမ်းခံရမှုအောက်တွင် နေထိုင်ခြင်း
စစ်အာဏာသိမ်းခံရမှုအောက်တွင် နေထိုင်ခြင်း
မြန်မာနိုင်ငံတွင် စစ်အာဏာသိမ်းခံရပြီးနောက် နေ့စဉ်ဘဝဖြတ်သန်းနေရပုံများကို ရေးသားထားသော ဒိုင်ယာရီများအား စုပေါင်းမှတ်တမ်းတင်ခြင်း
၂၀၂၁ ခုနှစ် ဖေဖော်၀ါရီလ ၁ရက်နေ့တွင် ဗိုလ်ချုပ်မှူးကြီးမင်းအောင်လှိုင် ဦးဆောင်သည့် မြန်မာစစ်တပ်သည် ၂၀၂၁ နို၀င်ဘာလတွင် ကျင်းပသော ရွေးကောက်ပွဲတွင် သောင်ပြိုကမ်းပြို အနိုင်ရခဲ့သော NLD အစိုးရအား ဖြုတ်ချကာ အာဏာသိမ်းယူခဲ့သည်။ ထိုနေ့နံနက်အစောတွင်ပင် နိုင်ငံတော်သမ္မတ ဦး၀င်းမြင့်၊နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊အချို့သော အစိုးရအဖွဲ့၀န်ကြီးများနှင့် ထိပ်ပိုင်းခေါင်းဆောင်များသည် အာဏာသိမ်းစစ်တပ်၏ အဓမ္မထိန်းသိမ်းခြင်းခံလိုက်ရသည်။ ထိုအချိန်မှစ၍ ပြည်သူလူထုသည် အရေးပေါ်အခြေအနေ ကြေငြာခြင်းနှင့် သွေးထွက်သံယိုနှိမ်နင်းမှုများကို အံတုကာ ဆုံးရှုံးသွားသော ဒီမိုကရေစီ ပြန်လည်ရရှိရေးအတွက် နည်းမျိုးစုံဖြင့် တိုက်ပွဲ၀င်နေကြသည်။ နိုင်ငံ့၀န်ထမ်းအချို့သည်လည်း အာဏာဖီဆန်ရေးလှုပ်ရှားမှု(CDM)ဦးဆောင်ကာ ပြည်သူလူထုနှင့်အတူ စစ်အာဏာရှင်၏ အကြမ်းဖက်နှိမ်နင်းမှုများကို ဆက်လက်ဆန့်ကျင်လျှက်ရှိသည်။ နိုင်ငံတကာအသိုက်အ၀န်းသည်လည်း အာဏာသိမ်းယူမှုကို အရေးယူရန်နှေးကွေးခဲ့ပြီး ယခုအခါ စစ်တပ်သည် မြန်မာနိုင်ငံ၏ အချို့ဒေသရှိ နေအိမ်များကိုပါ မီးရှို့ဖျက်ဆီးမှုများလုပ်ဆောင်လာခဲ့ကြသည်။ အမျိုးသားညီညွတ်ရေးအစိုးရသည် နိုင်ငံတော်ကာကွယ်ရေးတပ်ဖွဲ့ကို ဖွဲ့စည်းကာ လက်နက်ကိုင်တိုက်ပွဲ၀င်ရန်ဆုံးဖြတ်ခဲ့သည်။ ၂၀၂၂ ခုနှစ် ဧပြီလ၂၂ရက်နေ့အထိ အာဏာသိမ်းအဖွဲ့သည် လူပေါင်း ၁၇၈၂ ဦးကို သတ်ဖြတ်ထားပြီး လူပေါင်း ၁၀၂၉၀ ကို ထောင်သွင်းအကျဉ်းချထားကာ လူပေါင်း ၅၆၀၉၀၀ သည် ဘေးလွတ်ရာသို့ ရွှေ့ပြောင်းနေထိုင်နေကြရသည်။ လူပေါင်း ၅၃၀၀၀ သည်လည်း အိမ်နီးချင်းနိုင်ငံများနှင့် နိုင်ငံတာကာသို့ ခိုလှုံခွင့်ရရန် တောင်းခံနေကြရသည်။
နိုင်ငံအနှံ့ဖြစ်ပွားနေသောတိုက်ပွဲများ၊ဖမ်းဆီးခံရမှုများအကြောင်းများကို သတင်းမီဒီယာများမှ စဉ်ဆက်မပြတ်ရေးသားထုတ်လွှင့်နေသော်လည်း ပြည်သူများ လက်ရှိရင်ဆိုင်ဖြတ်သန်းနေရသော စီးပွားရေးကျဆင်းမှုများ၊နေ့စဉ်ကြုံတွေ့နေရသောလုံခြုံရေးပြသနာများ၊ယိုယွင်းလာသောကျန်းမာရေးစောင့်ရှောက်မှုများ အစရှိသော အကြောင်းအရာများကို အလေးပေးရေးသားဖော်ပြထားသော သတင်းများသည် တွေ့ရခဲလှသည်။ နိုင်ငံရေးမငြိမ်သက်မှု၊မီးရှို့ဖျက်ဆီးမှုများမြင့်တက်လာမှုနှင့်အတူ နိုင်ငံ၏စီးပွားရေးသည်လဲ ကျဆင်းလာခဲ့သည်။ ထိုကဲ့သို့စီးပွားရေးကျဆင်းလာမှုနှင့်အတူ ငွေကြေးဖောင်းပွခြင်း၊အခြေခံစားသောက်ကုန်စျေးနှုန်းများတရိပ်ရိပ်မြင့်တက်လာခြင်းများ၊အလုပ်အကိုင် အခွင့်အလမ်းဆုံးရှုံးမှုများ မြင့်တက်လာခဲ့သည်။ လျှပ်စစ်မီးပြတ်တောက်ခြင်းသည်လည်း ဆိုးရွားစွာ ရင်ဆိုင်ကြုံတွေ့နေရသည့်အပြင် အစားထိုးသုံးစွဲရန် ဒီဇယ်စျေးသည်လဲ ကမ္ဘာ တစ်၀ှမ်းမြင့်တက်လာမှုကြောင့် တစ်ပူပေါ်တစ်ပူဆင့်လျှက်ရှိသည်။ စစ်ကိုင်း၊မကွေး၊ကချင်၊ကယားနှင့် ချင်းပြည်နယ်ရှိ အချို့နေရာများတွင် အင်တာနက်လိုင်းများ၊ဖုန်းလိုင်းများ ဖြတ်တောက်ထားခြင်းကြောင့် ထိုဒေသရှိ ပြည်သူလူထုသည် ကိုဗစ်ကာလအတွင်း ကျယ်ပြန့်စွာ အသုံးပြုလာသော အွန်လိုင်းပညာရေးစနစ်နှင့် အွန်လိုင်းစီးပွားရေးများ မလုပ်ကိုင်နိုင်ဘဲ ရှိလာခဲ့သည်။အစစအရာ ပျက်စီးလာမှုနှင့်အတူ “မည်သည့်နေရာမှ လုံခြုံမှုမရှိ”ဆိုသည့် ခံစားချက်များ ပြည်သူလူထုကြားထဲတွင် ဖြစ်တည်လာခဲ့သည်။ ထို့ကြောင့် ဤစီမံချက်သည် စစ်အာဏာသိမ်းပြီးနောက် ပြည်သူများသည် လက်ရှိရင်ဆိုင်ကြုံတွေ့နေရမှုများကိုဖြေရှင်းနေရပုံများကို စုဆောင်းမှတ်တမ်းတင်ရန် ပေါ်ပေါက်လာခြင်းဖြစ်သည်။ သမိုင်းဟူသည် မေ့ပျောက်ပစ်ပယ်ရန် မဖြစ်နိုင်သောကြောင့် “စစ်အာဏာသိမ်းမှုအောက်မှာနေထိုင်ခြင်း”ဆိုသည့် ဤဖိတ်ခေါ်ချက်လေးသည် မြန်မာနိုင်ငံတစ်၀ှမ်းရှိပြည်သူများ(မည်သည့်ဘာသာကိုးကွယ်သူမဆို၊မည်ကဲ့သို့သောပညာရေးနောက်ခံရှိသူမဆို၊ မည်သည့်တိုင်းရင်းသားလူမျိုးမဆို၊အသက်အရွယ်မဆို) စစ်အာဏာသိမ်းခံရအပြီး ရင်ဆိုင်ကြုံတွေ့ခံစားနေရသည်များကို မှတ်တမ်းတင်ထားရန် ရည်ရွယ်ပါသည်။
မိမိ၏ကြုံတွေ့ ခံစားနေရသည်များကို ပြန်လည်မျှဝေလိုသူများသည် ပြန်လည်မျှ ဝေလိုပါက မိမိကြိုက်နှစ်သက်ရာ ဘာသာ(အင်္ဂလိပ်သို့မဟုတ် မြန်မာ)ဖြင့် တစ်ရက် မှတစ်ပတ်စာ ရေးသားထားသော diaries (သို့မဟုတ်) ဓါတ်ပုံများ (သို့မဟုတ်) ပုံဖော်ရေးဆွဲထားသောပန်းချီများ ကို SEA Junction email southeastasiajunction@gmail.com (သို့) Signal +66 970 024 140 ဆက်သွယ်ပေးပို့နိုင်ပါသည်။ ရွေးချယ်ခံရသော စာမူများကို SEA Junction websiteနှင့် စုပေါင်းမှတ်တမ်းစာအုပ်တွင် မှတ်တမ်းတင်ထားမည်ဖြစ်ပြီး စာမူခများလဲ ပေးအပ်ချီးမြှင့်သွားမည် ဖြစ်ပါသည်။ ရေးသားပေးပို့သူများ၏ အမည်များ၊ ကိုယ်ရေးအချက်အလက်များကိုစာရေးသူ၏ ခွင့်ပြုချက်မပါဘဲ ဖော်ပြမည်မဟုတ်သောကြောင့် လုံခြုံစိတ်ချလွတ်လပ်စွာရေးသားပေးပို့နိုင်ပါသည်။
ပေးပို့မည့်အကြောင်းအရာအားလုံးကို ကြိုဆိုလျှက်ပါ။
ဖြစ်မြောက်ရေး စီစဉ်ပံ့ပိုးသူများ
SEA Junction
SEA Junction သည် ထိုင်းနိုင်ငံ ဘန်ကောက်မြို့အခြေစိုက် အစိုးရမဟုတ်သော အဖွဲ့အစည်းတစ်ခုဖြစ်ပြီး အရှေ့တောင်အာရှနိုင်ငံများအကြောင်းကို လေ့လာရန်နှင့် အနုပညာလက်ရာများ၊ လူနေမှုပုံစံများ၊ စီးပွားရေးနှင့် ဖွံ့ဖြိုးတိုးတက်ရေးအစရှိသည်တို့ကို ဖော်ထုတ်၍ မတူညီသော လူမှုအသိုက်အ၀န်း ယဉ်ကျေးမှုများကို မျှဝေရန် တည်ထောင်ထားခြင်းဖြစ်သည်။ ထို့အပြင် အရှေ့တောင်အာရှနိုင်ငံများကို စိတ်ဝင်စားသူများ ကျောင်းသားများ ဒေသတွင်းလက်တွေ့လုပ်ကိုင်ဆောင်ရွက်နေသူများ အတွက် အာဆီယံနှင့်ဆိုင်သော ဗဟုသုတများကို သိရှိနားလည်နိုင်ရန် ဆောင်ရွက်ပေးလျှက်သည်။ SEA Junction ရုံးကို Bangkok Art and Culture Center (BACC)၏ စတုတ္ထထပ် (MBK shopping Mall မျက်နှာချင်းဆိုင်) တွင် ဖွင့်လှစ်ထားသည်။ SEA Junction အကြောင်းပိုမို သိရှိလိုပါက SEA Junction website (http://seajunction.org/)တွင် ဝင်ရောက်ကြည့်ရှုခြင်းဖြင့်သော်လည်းကောင် Facebook, Twitter, Instagramတို့တွင် follow လုပ်ထားနိုင်ပါသည်။
Asia Justic and Rights (AJAR)
Asia Justic and Rights (AJAR)သည် အင်ဒိုနီးရှားနိုင်ငံ ဂျာကာတာတွင် အခြေစိုက်သော အစိုးရမဟုတ်သော အဖွဲ့အစည်းတစ်ခုဖြစ်သည်။အာရှ-ပစိဖိတ်ဒေသတွင် လူ့အခွင့်အရေးများကို အလေးထားအားကောင်းလာစေရန်နှင့် အာရှ-ပစိဖိတ်ဒေသတွင်း ဉပဒေမဲ့ပြစ်မှုကျူးလွန်ထားသော်လည်း တရားမဲ့ကင်းလွတ်ခွင့်ရနေသူများကို အပြစ်ပေးအရေးယူဆောင်ရွက်ပေးရေး ပါ၀င်ကူညီရန် ရည်ရွယ်၍ တည်ထောင်ထားခြင်းဖြစ်ပါသည်။ လူ့အခွင့်အရေးချိုးဖောက်မှုများကို တာဝန်ခံမှုရှိလာစေရေး၊ တရားမျှတာမှုရရှိအောင်ဆောင်ရွက်မှု၊ ထပ်တလဲလဲကျူးလွန်ခြင်းများမှ ကာကွယ်ရန် ယဉ်ကျေးသော အသိုက်အ၀န်း တစ်ရပ်တည်ဆောက်ရန် ကြိုးပမ်းဆောင်ရွက်လျှက်ရှိသည်။ ယခင်က အခြေခံလူအခွင့်အရေးများကို ချိုးဖောက်ကျူးလွန်ပြီး ယခုအခါ ဒီမိုကရေစီအသွင်ကူးပြောင်းရေး ဆောင်ရွက်နေသည့် နိုင်ငံများတွင် အဓိကထားလုပ် ဆောင်လျှက်ရှိသည်။ Asia Justic and Rights (AJAR) အကြောင်းပိုမို သိရှိလိုပါက https://asia-ajar.org/ တွင်ဝင်ရောက်ကြည့်ရှုနိုင်ပါသည်။